عبث المرايات

بتكلم مع مرايات البيت،

في مرايا أشوف حاجب منكوش،

وشعرات تتخانق مع شعرات،

والصلع فوق راسي وراثي،

ومرايا قديمة مصدية،

مرمية فوق على الدولاب،

لو جيت أكلمها تقولي..

وصوتها مليان ألم وعذاب،

بتقولي ايه حصلك يا واد مالك ؟!

احكيلي ازاي كدة شعرك شاب!!

قلتلها يا مرايا أنا لسة شباب..

ازاي شيفاني عجوز شايب؟!

قالتلي انا مرايا قديمة..
بشوف بعيوني الهلكانة..

بشوف جواك أوي.. مش براك،،

بشوف قلبك متقطع..

نكسات غدر وفراق أحباب..

بشوف رجليك بقت تعرج..

وايديك تتحرك مرعوشة..

سامعة الروح بتئن جروح..

بتقول يارب .. امتى هروح..

متآخذنيش يابني أنا متشاءمة..

مرايا عجوزة وخرفانة..

من كتر ما شفت كتير اسوديت..

مابالك لو تشوف قلبك..

فكرك قلبك هيتحمل؟!

وأنا اللي جماد متحملتش..

اكسرني يابني ودوس على فتاتي..

ولملم حطامي وفي البحر ارميه..

أنا كرهت الدنيا بما فيها..

وكرهت تشوف عيبك في عنيا..

أنا أحن عليك يابني من كل الناس..

حبيت أصارحك بحقيقتك..

لاجل ما تواجه مصيرك وخلاص..

متآخذنيش لو كنت زعلتك..

ده واجبي عليك .. أنا مرايتك..

قديمة صحيح لكن شفتك..

من يوم ميلادك وعرفتك..

محدش في الدنيا فهمك قدي..

ولا حد عنده طولة بال يفهم..

وصيتي ليك تبقى مرايا..

ساعات العكس لما بيتشاف..

بيقدر يدي المعنى صحيح..